《或者存在的不存在職業 –安樂死執行者》
自從安樂死喺唔同國家合化法，安樂死亦都產生咗一種既定程序。
接受安樂死嘅病人會安裝一部儀器，
儀器上有個按鈕，只要一撳按鈕，
凝血劑就會大量輸入，造成血管阻塞，最後死亡。
呢個制，唔難撳。
但呢個制，冇人願意撳。
自從「安樂死」普及化後，
「撳制」都成為咗一門生意。
初次大家呢門生意冇得做，但好快就知，呢門生意冇得唔做。
因為幾親嘅家屬，面對呢個制都只有卻步同退縮。
說穿了，撳一次制，就係殺一個人。
或者佢哋心底仲有「殺咗人就要落地獄」嘅觀念。
呢啲Dirty Job，冇人想做。所有人都等，等一個人孭上身。
所以我出現，收錢幫佢哋撳制，送走佢哋嘅親人。
當然，親屬唔會貿貿然請一個三唔識七嘅人做呢樣工作，
所以我哋有包裝，會叫親屬準備死者生前嘅資料，等我去了解佢，認識佢，先由衷地送佢上路。
我哋口號係「讓一個最親的新朋友，送你到新宇宙」。
幾好聽係咪？
但諗深一層，
呢班親屬所表現嘅只係一種偽善。
怕負起撳制嘅責任，於是想搵人做。但又怕閒言閒語，所以拼命地幫呢個人打造成「最親的新朋友」。
好偽善。
說穿了，我只係一個收佢哋幾千蚊，幫佢哋撳個制嘅閒人。
唔係咩新朋友，更冇咩新宇宙。
死亡，就係合埋眼，合埋眼... 合埋眼... 合埋眼... 合埋眼...
冇後續故事，冇靈魂出竅。
而所謂死者嘅生前資料，我拎完返去之後根本冇睇過。
吖唔係，都有嘅，只睇頭一頁同最後一頁。
呢啲資料，只係搵個藉口，畀家屬覺得自己有為死者盡一分力，
從而安慰自己已經幫咗好多手。即使係白做，付出過就會心安理德。
最後即使安樂死呢個決定令大家後悔，
自己都有退路，有「不被責怪」嘅借口。
我撳呢個制，唔係幫死者解脫，而係幫呢班親屬自我救贖。
因為，最唔放過自己嘅就係自己。
有賴人類嘅偽善，我生意興隆。
-------------------------------------------------------
30年後。
自從幾年前患上癌症，反覆治療下令我痛不欲生。而且我知道死亡係遲早嘅事。
我決定安樂死。
作為「安樂死執行行業」嘅傳奇，我唯一要求係由親人撳返呢個按鈕。
而且安樂死之前，我拒絕深度睡眠，我想睇下自己嘅親人係咪都一樣咁偽善。
程序開始。
眾人低頭，泣不成聲。大仔曾經步前兩步，卻又退後三步。
呼吸聲、啜泣聲、拭淚聲，喺病房中盤旋。
呢種畫面，明明呢30年我見過上千次，每次我都係嗤之以鼻，認為眼淚只係偽善嘅一部份。
但今日，我有啲被打動，睇住大家為我喊，唔知點解有啲欣慰，每滴眼淚好似都證明住自己喺他人心中嘅重量。
原來冇偽善，只有不捨。
唔撳呢個制，唔係虛偽；而係唔捨得。
因為一撳，大家就連對望都再冇機會。
30年嚟，我企喺「收錢開工」嘅一方，處於情感盲點，困喺自己嘅陰險宇宙，去猜度世上嘅所有親情。
幫一個親人解脫，原來係咁難受，因為你內心永遠都想救佢。
搵人待勞，唔係怕孭上身，
只係單純地唔捨得，冇呢份勇氣。
眼前咁多個親人，同我嘅所有經歷感情，終於令我明白呢30年嚟，自己內心怪錯咗幾多人。同時慶幸自己份職業並非只係衍生偽善。
「好啦，成班傻仔傻女，你知唔知我人生最大嘅成就係咩？」
我拼盡最後一口氣，向親人說出呢返話。
「就係送人去新嘅宇宙」我用左手靠近按鈕，同時右手舉出V字手勢。
我決定履行最後一次「安樂死執行者」，幫自己撳呢個制。
有學者講過，靈魂嘅重量係21克。
呢個制，都設定咗只要用21克嘅按力，就會斷送一個靈魂。
我將21克嘅靈魂注入按鈕，同自己嘅身體說再見。
謝謝你們的不捨，令我知道你們對我的愛。
--------------------------------
其他不存在的職業系列Album：https://goo.gl/xh4bbt
《死亡剪片師》https://goo.gl/le9re9
《超人身後的救災重建小隊》https://goo.gl/1HcJq6
《試毒員》https://goo.gl/f3ruQ9
《緣份修正老人》https://goo.gl/I2p3Ao
《都市傳說文案人》https://goo.gl/aqYG8x
《死前通知員》https://goo.gl/jK49QO
Ig:cheungson88
*會慢慢Up嘢上去
Search